በክልሉ ለአምራች ኢንዱስትሪዎች ምቹ ሁኔታን በመፍጠር የውጭ ምንዛሬ አቅምን ለማሳደግ በተከናወነ ሥራ ውጤት ተመዝግቧል

አርባምንጭ ፤ ሐምሌ 15/ 2017 (ኢዜአ)፦በደቡብ ኢትዮጵያ ክልል ለአምራች ኢንዱስትሪዎች ምቹ ሁኔታን በመፍጠር የተኪ ምርቶችን ሚና በማጉላት የውጭ ምንዛሬ አቅምን ለማሳደግ በተከናወኑ ሥራዎች ውጤት መመዝገቡን የክልሉ ኢንዱስትሪ ፓርኮች ልማት ኮርፖሬሽን አስታወቀ።

ኮርፖሬሽኑ የኢትዮጵያ ታምርት ንቅናቄን ለማሳካት ከ40 በላይ አምራች ኢንተርፕራይዞች እና አልሚ ባለሀብቶች የሚሳተፉበት ዐውደ ርዕይና ባዛር በአርባ ምንጭ ከተማ ማዘጋጀቱም ተመላክቷል።

የኮርፖሬሽኑ ዋና ስራ አስፈጻሚ አቶ ጥላሁን ብርሃኑ በሰጡት መግለጫ እንዳሉት ተቋሙ በተሰጠው ተልዕኮ መሠረት በተቀናጀ የግብርና ኢንዱስትሪ ፓርክ እና በአምራች ኢንተርፕራይዞች ክላስተር ልማት ውጤታማ ስራ እያከናወነ ይገኛል።

ለአምራች ኢንዱስትሪዎች ምቹ ሁኔታን በመፍጠር የተኪ ምርቶችን ሚና በማጉላት የውጭ ምንዛሬ አቅምን ለማሳደግ በተከናወኑ ሥራዎች ውጤት እየተመዘገበ መሆኑን ገልጸዋል።

በዚህም በተጠናቀቀው የበጀት ዓመት በአምራች ኢንተርፕራይዞችና አልሚ ባለሀብቶች የጨርቃ ጨርቅ፣ የዘይትና የሞሪንጋ ምርቶችን ወደ ውጭ በመላክ 1 ነጥብ 6 ሚሊዮን የአሜሪካን ዶላር ማግኘት ተችሏል ብለዋል።

በአንጻሩም በተኪ ምርት 30 ሚሊዮን ብር የሚሆን የውጭ ምንዛሬን ማዳን መቻሉን ዋና ስራ አስፈጻሚው ገልጸዋል።

በክልሉ ዲላ እና ይርጋጨፈ ሁለት የመካከለኛ ግብርና ኢንዱስትሪ ፓርኮች መኖራቸውን ጠቅሰው የዲላ ግብርና ኢንዱስትሪ ፓርክ በበጀት ዓመቱ 50 ሺህ ሊትር ድፍድፍ የአቮካዶ ዘይት አምርቶ ወደ ውጭ መላኩን ተናግረዋል።

በቡና፣ በወተትና በሌሎች ምርቶች ማቀነባበር ስራ ላይ የሚሰማራው የይርጋጨፌ ግብርና ኢንዱስትሪ ፓርክ በ2018 ዓ/ም በሙሉ አቅሙ ወደ ሥራ እንደሚገባ ጠቁመዋል።

በሌላ በኩል በክልሉ በ9 ከተሞች በሚገኙ 17 ክላስተር ማዕከላት 150 ሼዶች መኖራቸውን ጠቅሰው ከነዚህም ውስጥ 126ቱ አምራች ኢንተርፕራይዞች በተለያዩ የሥራ መስኮች ላይ መሰማራታቸውን አስረድተዋል።

ኢንተርፕራይዞቹ በእንጨትና ብረታ ብረት፣ በአግሮ ፕሮሴሲንግ፣ በኬሚካል ውጤቶች፣ በሽመና፣ በቆዳና ሌጦ እንዲሁም በጨርቃ ጨርቅና ሌሎች ስራዎች ላይ በመሰማራት ውጤታማ እየሆኑ ይገኛሉ ብለዋል።

ኮርፖሬሽኑ ከ40 በላይ አምራች ኢንዱስትሪዎች እና አልሚ ባለሀብቶች የሚሳተፉበት ክልል አቀፍ ባዛርና ዐውደ ርዕይን የፊታችን ሐምሌ 17 እና 18 ቀን 2017 ዓ/ም በአርባ ምንጭ ከተማ ለማካሄድ ዝግጅት ማጠናቀቁን አስታውቀዋል።

ይህም ኢንተርፕራይዞች እና አልሚ ባለሀብቶች ምርቶቻቸውን በማስተዋወቅ የገበያ ትስስር እንዲፈጥሩ ታስቦ መዘጋጀቱንም አመልክተዋል።

በመርሃ-ግብሩ ላይም በ39 ሚሊዮን ብር የተገነባው የአርባምንጭ ከተማ የአምራች ኢንዱስትሪዎች ሼድ ምረቃ የሚካሄድ ሲሆን የአረንጓዴ አሻራ ልማት እና የኢንዱስትሪ ልማት የምክክር መድረክ አጀንዳዎች እንደሚኖሩም ተጠቁሟል።