አዲስ አበባን ውብ እና ጽዱ በማድረግ ሂደት ላይ አሻራችንን በማኖራችን ኩራት ይሰማናል - የኮሪደር ልማት ሰራተኞች

አዲስ አበባ፤ ሚያዚያ 2/2017(ኢዜአ)፡- አዲስ አበባን ውብ እና ጽዱ በማድረግ ሂደት ላይ አሻራችንን በማኖራችን ኩራት ይሰማናል ሲሉ የኮሪደር ልማት ሰራተኞች ገለጹ።

በመጀመሪያው ምዕራፍ የኮሪደር ልማት የመንገድ፣ የመብራት፣ የቤት ግንባታ እና እድሳት እንዲሁም ሌሎች የልማት ተግባራትን በማከናወን መዲናዋን ትርጉም ባለው መልኩ ማስዋብ እና ማሳመር ተችሏል፡፡

የሁለተኛ ምዕራፍ የኮሪደር ልማት የወንዝ ዳር ልማቶችን ጨምሮ በስምንት የተለያዩ የከተማዋ አካባቢዎች በመፋጠን ላይ ይገኛል፡፡

የአዲስ አበባ ከተማ አስተዳደር ከንቲባ አዳነች አቤቤ በከተማዋ የተለያዩ አካባቢዎች በመከናወን ላይ የሚገኘውን የሁለተኛው ምዕራፍ የኮሪደር ልማት የስራ እንቅስቃሴ ትናንት ምሽት ተዘዋውረው ጎብኝተዋል።

ከንቲባዋ በኮሪደር ልማቱ እየተሳተፉ የሚገኙ ሰራተኞችን በማበረታታት የእራት ግብዣ አድርገዋል።

የልማት ስራዎቹን በተቀመጠላቸው ጊዜ እና ጥራት ለማጠናቀቅ ሳምንቱን ሙሉ ቀን ከሌት ስራው እየተከናወነ ይገኛል፡፡

በምሽት የኮሪደር ልማት እየተሳተፉ ከሚገኙ ሰራተኞች መካከል ሳሙዔል አዲሱ ለኢዜአ በሰጠው አስተያየት፤ ከንቲባ አዳነች አቤቤ በስራ ቦታችን ተገኝተው ስላበረታቱን ከፍተኛ ደስታ ተስምቶናል ብሏል።

ጉብኝቱ ይበልጥ ለስራ እንዲበረቱና ልማቱን በተያዘለት እቅድ ለማጠናቀቅ እንዲተጉ የሞራል ስንቅ እንደሆናቸውም ገልጿል።

እኛም አዲስ አበባ ከተማን ውብ እና ጽዱ በማድረግ ሂደት ላይ አሻራችንን በማኖራችን ኩራት ይሰማናል ነው ያለው።

ሌላኛዋ የኮሪደር ልማት ሰራተኛ መዲካ ከበደ በበኩሏ፤ የኮሪደር ልማቱ ለእናቶች፣ ለወጣቶችና ለሴቶች የስራ እድል መፍጠሩን ተናግራለች፡፡

ከንቲባዋም በየጊዜው እየመጡ ሰራተኞችን እንደሚያበረታቱ እና ድጋፍ እንደሚያደርጉላቸው አንስታለች።

አዲስ አበባ ከተማን ለማስዋብ በሚደረግ ጥረት የበኩሌን አስተዋጽኦ እየተወጣሁ በመሆኑ ክብርና ደስታ ይሰማኛል ያለችው ደግሞ ሌላዋ በኮሪደር ልማቱ ስራ ላይ እየተሳተፈች የምትገኘው ሜላት አበበ ናት፡፡