በክልሉ የነዳጅ ግብይትን ህጋዊነት በመቆጣጠር የትራንስፖርት እንቅስቃሴን ለማሳለጥ በቅንጅት እየተሰራ ነው

🔇Unmute

ጅግጅጋ፤ መጋቢት 25/2018(ኢዜአ)፦ በሶማሌ ክልል የነዳጅ ግብይትን ህጋዊነት በመቆጣጠር የትራንስፖርት እንቅስቃሴን ለማሳለጥ በቅንጅት እየተሰራ መሆኑን የክልሉ ንግድና ትራንስፖርት ቢሮ ገለጸ።

የሶማሌ ክልል ንግድና ትራንስፖርት ቢሮ ሃላፊ አቶ አብዱልሀኪም ሼክ ሀሰን በሰጡት መግለጫ በመካካለኛው ምስራቅ የተከሰተውን አለመረጋጋት ተከትሎ የገጠመው የነዳጅ ግብይትና አቅርቦት ጫና በህብረተሰቡ ላይ ተጽዕኖ እንዳያደርስ ጥብቅ ቁጥጥር መደረጉን ገልጸዋል።

ለተግባራዊነቱም የቅድሚያ ቅድሚያ ነዳጅ ለሚያስፈልጋቸው ተሽከርካሪዎች፣ የኤክስፖርት ድርጅቶች፣ የመንግሥትና የግል ፕሮጀክቶች፣ የገቢና ወጪ ንግድን ጨምሮ መሠረታዊ የፍጆታ ምርቶችን የሚያጓጉዙ ተሽከርካሪዎች ተደራሽ መደረጉን አንስተዋል።

ከዚህ ባለፈም ህገ-ወጥ የነዳጅ ግብይትን ለመቆጣጠር የክልሉ የጸጥታ ተቋማት ከፌዴራል ፖሊስና ከጉምሩክ ኮሚሽን ጋር በቅንጅት እየተሠራ ነው ብለዋል።

በዚህም ህገ-ወጥ የነዳጅ ዝውውርን ለመግታት በተደረገው ጥረት 3ሺህ 500 ሊትር ነዳጅ ከሰሞኑ በቁጥጥር ስር መዋሉን ገልጸዋል።

ህብረተሰቡ ህገ-ወጥ የነዳጅ ዝውውርን ለመቆጣጠር በሚደረገው ቅንጅታዊ ስራ ያለውን ተሳትፎ እንዲያጠናክርም ሃላፊው ጠይቀዋል።

በክልሉ አዲሱ የነዳጅ ጭማሪ ታሪፍ መደረጉንና ህብረተሰቡ ነዳጅን በቁጠባ እንዲጠቀም የግንዛቤ ስራ እየተካሄደ መሆኑንም ጠቁመዋል።

ህብረተሰቡ ሌሎች ታዳሽ ሀይልን በመጠቀምና አላስፈላጊ ጉዞ በመቀነስ የነዳጅ ቁጠባውን ተግባራዊ እንዲያደርግም መክረዋል።